1）面油：⭐️⭐️
小編皮膚屬混合性，typical水油平衡錯錯地～T-zone易出油，兩邊面頰較乾，平日就算每朝敷mask之後先化妝呢～一到lunch後個額頭同鼻哥都feel到有層油，然後個粉底就毫不留情的浮⋯⋯做完草本打後一星期，雖然可能因為小編身處台灣，天氣冇咁潮濕嘅原故，面油減少一半有多！就算出入冷氣地方都冇覺得塊面笠痴痴～除咗望落唔會令立立，自己係feel到皮膚爽咗嘅！至少感覺良好啦～

2）暗粒：⭐️⭐️⭐️⭐️
暗粒嘅原兇係油脂，油脂被困表皮下形成油脂粒，亦係暗瘡嘅雛形。小編油脂分泌失衡嘅原因主要係工作壓力，所以暗粒集中生喺額頭位置⋯⋯最乞人憎係某一兩個毛孔嘅暗粒係春風吹又生type！每次做針清，Geania開針挑完、清咗！然後佢又再生出嚟！呢個cycle已經loop咗好多次⋯⋯做完草本，我喺額頭其中一粒好好好頑固嘅暗粒係有發炎嘅，個發炎反應比平日嚴重，有含膿嘅情況～不過只要注重清潔，等個膿瘡自己成熟，然後凋謝脫落就唔需要擔心。因為其實「發炎」係身體開啟自我防衛機制嘅signal，發完炎、個含膿嘅毛孔清乾淨咗，問題自然會改善！而小編好好彩，粒頑固暗粒做完一次就斷咗尾！（跳起yea）

3）毛孔：⭐️⭐️⭐️
小編中學時期油脂分泌簡直錯亂到不行，鼻翼鼻頭勁爆石頭瘡所以有輕微鼻渣鼻，即係毛孔因為發炎後被擴大而未能回復原貌，總之就嚴重大毛孔啦。如果我話做完一次草本個酒渣鼻就收到變零，就一定係作大！咁的確個毛孔仍然篤眼篤鼻嘅，不過新陳代謝產生嘅污垢比之前更容易清出，至少用潔面產品洗完面之後個毛孔已經睇到「空nell nell」。睇嚟做多一兩次，個毛孔好大機會被修飾到唔再顯眼！

4）色斑：⭐️⭐️⭐️⭐️⭐️
嗱～利申～俾5粒星星唔係代表做完一次就會冇晒色斑呀下！俾5粒星星係因為小編覺得草本處理本人色斑嘅問題嘅過程好amazing～話說小編好弱智，右邊面有三粒深到我以為係痣定癦嘅斑，總之幾粒黑色點點啦⋯所以我一直都冇打算處理佢，因為癦嘅嘢，人人都有幾粒架啦！然後由於呢幾粒黑色點點生正喺我右邊面嘅中央，係做全面草本一定會觸及嘅位置～嘩不得了！做完草本，位置最高而又最深色嗰粒斑，損咗變咗紅色（即係塊面有個細細嘅紅色實心圓形），但又冇好似額頭粒暗粒咁含膿發炎，只係損咗，然後結焦～我開頭以為係磨得太勁磨損咗，原來草本係有做嘢嘅！甩焦嗰一秒，我對住個鏡叫咗出嚟～因為我以為粒癦成粒甩咗出嚟！！！然後面上只淨低一個好淡嘅印～雖然我唔知點解得最頂嗰粒有反應，不過三筒變二筒的確係大快人心嘅～哈哈！